قیامِ پاکستان کے اوائل ہی سے افواجِ پاکستان مُلکی سرحدوں کی حفاظت اور مِلّی خدمات کی ادائیگی میں پیش پیش رہی ہیں۔ مہاجرین کی آبادکاری کا معاملہ ہو یا 1948ء میں کشمیر کے محاذ پر ہونے والی جنگ، 1965ء میں دشمن کی جارحیت ہو یا 1971ء کی جنگ، کارگل کا معرکہ ہو یا پھر نائن الیون کے بعد شروع ہونے والی دہشت گردی کے خلاف جنگ، افواجِ پاکستان کے سپوتوں نے پاک سرزمین کی حفاظت اپنی جانوں کی پرواہ کئے بغیر یقینی بنائی ہے۔ وَطنِِ عزیز کے انہی بیٹوں کو خراجِ تحسین پیش کرنے کے لئےآج سے تقریباً سوا دو برس قبل 23 مارچ 2018ء ، یومِ پاکستان کے موقع پرملک کے لئے مختلف جنگوں اور معرکوں میں جامِ شہادت نوش فرمانے والے افسروں، جوانوںاور غازیوں کے حوالے سے شعبۂ تعلقاتِ عامہ افواجِ پاکستان نے ایک کتاب ’’جنونِ رُخِ وفا‘‘ شائع کی۔ جسے شہداء اور غازیوں کےعزیزو اقارب کے ساتھ ساتھ دیگر قارئین نےبھی بہت پسند کیا ۔ اب ہلال پبلیکیشنز کی جانب سے دوسری کتاب ’’ اہلِ عزم و ہمت‘‘ شائع کی جارہی ہے۔جس میںتینوں افواج، برّی، بحری،فضائیہ کے ساتھ ساتھ ایف سی، رینجرز،دیگر قانون نافذ کرنے والے اداروںاور پاکستان کے بہادر عوام کی بے مثال قربانیوںکو اُجاگر کیا گیا ہے ۔کتاب میںشامل ہر مضمون ایک ایسا شفاف آئینہ ہے ، جس میں شہدائے وطن کے پر انوارخدّو خال اور غازیانِ ملک و ملت کے پُر خطر حربی معرکے اور اُن سے وابستہ رشتے داروں، عزیزوں اوردوستوں کے دلوں کی کیفیت آپ اپنی آنکھوںسے دیکھ سکیں گے۔ چونکہ اِن تحریروں میں کئی ایسے وقت پر لکھی گئیں جب دہشت گردی اپنے عروج پر تھی ، یا اس کے خلاف کوئی مخصوص آپریشن کیا جارہا تھا۔اس لئے اِن تحریروں میں آپ کو اُس وقت کے جذبات و احساسات کا عکس نظر آئے گا۔ وطن کی مٹی اور فرض کی پکار پر لبیک کہنے والوں کی یہ داستانیں پڑھتے ہوئے کئی مرتبہ آپکی آنکھیں نمناک تو ہوں گی مگر اس کے ساتھ ساتھ فخر و حوصلے کےجذبات بھی مہمیز ہوں گے کیونکہ زندہ قومیں ہمیشہ اپنے شہیدوں اور غازیوںکو یاد بھی رکھتی ہیں اور خراجِ تحسین بھی پیش کرتی ہیں۔ ادارہ اِن تمام تحریر نگاروں کا شکریہ ادا کرتا ہے جنہوں نےارضِ پاک کے شہیدوں اور غازیوںسےمتعلق اپنی تحریروں کے ذریعے وابستگی کا والہانہ اظہار کیا ہے۔ ہمیں امید ہے ’’جنونِ رُخِ وفا‘‘ کی طرح اس کتاب’’اہلِ عزم و ہمت‘‘ کے مضامین کو بھی قارئین کی جانب سے پزیرائی حاصل ہو گی۔