گزشتہ دنوں چیئرمین جوائنٹ چیفس آف سٹاف کمیٹی جنرل ساحر شمشاد مرزاکویت کے سرکاری دورے پر تھے۔جنرل ساحر شمشاد نے کویت کے ولی عہد شیخ صباح الخالد الحمد المبارک الصباح اول نائب وزیراعظم، وزیردفاع اور وزیرداخلہ شیخ فہد یوسف الصباح، انڈر سیکرٹری کویت نیشنل گارڈ لیفٹیننٹ جنرل انجینئر ہاشم الرفیع، انڈر سیکرٹری کویٹ نیشنل گارڈ شیخ عبداللہ مشعل الصباح انڈر سیکرٹری وزارت دفاع اور میجر جنرل جابر الصباح کویت کی مسلح افواج کے قائم مقام چیف آف سٹاف سے ملاقات کی۔

اعلیٰ سطحی ملاقاتوں میں دوطرفہ امور اور دفاعی تعاون پر تبادلہ خیال کیا گیا۔ دونوں اطراف نے اپنے مشترکہ وعدوں کا اعادہ کیا، اور دفاع اور سلامتی کے شعبوں میں باہمی تعاون کی اہمیت پر زور دیا۔ چیئرمین جوائنٹ چیفس آف سٹاف کمیٹی نے مبارک العبداللہ جوائنٹ کمانڈ اینڈ سٹاف کالج کا بھی دورہ کیا، جہاں انہیں اکیڈمی میں ہونے والی تربیتی سرگرمیوں کے بارے میں بریفنگ دی گئی۔قبل ازیں کویت پہنچنے پر چاق چوبند دستے نے چیئرمین جوائنٹ چیفس آف سٹاف کمیٹی سی کو گارڈ آف آنر پیش کیا۔