چیف آف آرمی سٹاف، جنرل سید عاصم منیرنے نارووال اور سیالکوٹ کے قریب فیلڈ ٹریننگ مشق میں حصہ لینے والے فوجیوں سے ملاقات کی۔
انہیں مشق کے مقاصد اور انعقاد کے بارے میں ایک جامع بریفنگ دی گئی، جس کا مقصد پیشہ ورانہ مہارتوں اور میدان جنگ کے طریقہ کار کو بہتر بنانا تھا جو ابھرتے ہوئے آپریشنل چیلنجوں سے نمٹنے کے لیے ضروری ہیں۔
مشق کے دوران آرمرڈ، انفنٹری، میکانائزڈ انفنٹری، آرٹلری، ایئر ڈیفنس، آرمی ایوی ایشن اور اینٹی ٹینک گائیڈڈ میزائل یونٹس سمیت مختلف عناصر کی جانب سے مربوط فائر اور مینیوور آپریشنز کیے گئے۔ اس مشق میں جنگی صلاحیتوں اور معلوماتی آپریشنز کے موثر استعمال کا بھی مظاہرہ کیاگیا ۔
چیف آف آرمی سٹاف نے پورا دن جوانوں کے ساتھ میدان میں گزارا اور ان کے تربیتی معیار، آپریشنل تیاری اور بلند حوصلے کی تعریف کی۔ شرکا کے ساتھ اپنی بات چیت میں، انہوں نے دشمن کی طرف سے لاحق کسی بھی ممکنہ خطرات کا مقابلہ کرنے کے لیے مستقل تیاری کو برقرار رکھنے کی اہمیت پر زور دیا۔
چیف آف آرمی سٹاف نے اس عزم کا اظہار کیا کہ پاکستان کی مسلح افواج، قوم کی پرعزم حمایت کے ساتھ، تمام خطرات کے خلاف ہمارے پیارے مادر وطن کی علاقائی سا لمیت اور خودمختاری کی حفاظت کرنے کی مکمل صلاحیت رکھتی ہیں۔
قبل ازیں، مشق کے علاقے میں پہنچنے پر، کمانڈر گوجرانوالہ کور اور انسپکٹر جنرل آف ٹریننگ اینڈ ایویلیوایشن نے ان کا استقبال کیا۔
تبصرے