گزشتہ دنوں آسٹریلوی فوج کے سربراہ لیفٹیننٹ جنرل سائمن سٹورٹ نے جنرل ہیڈ کوارٹرز (جی ایچ کیو)میں چیف آف آرمی سٹاف جنرل سید عاصم منیر سے ملاقات کی۔ملاقات کے دوران دونوں رہنمائوں نے باہمی دلچسپی کے امور بالخصوص عالمی اور علاقائی سلامتی پر تبادلہ خیال کیا۔ آرمی چیف نے امن اور استحکام کے مشترکہ اہداف کو فروغ دینے میں مضبوط دوطرفہ تعلقات کی اہمیت پر زور دیا۔ دونوں اطراف نے علاقائی اور عالمی امن کے لیے جاری تعاون کی اہمیت کو تسلیم کرتے ہوئے دفاع اور سلامتی میں تعاون کو مزید مضبوط بنانے کے عزم کا اعادہ کیا۔لیفٹیننٹ جنرل سٹورٹ نے دہشت گردی کے خلاف پاکستان کی کوششوں کو سراہا اوردوطرفہ دفاعی اور سکیورٹی تعاون کو مزید گہرا کرنے کے عزم کا اظہار کیا۔

قبل ازیں جی ایچ کیو پہنچنے پر آسٹریلوی آرمی چیف نے یادگار شہدا پر پھولوں کی چادر چڑھائی اور پاکستان کے شہدا کو خراج عقیدت پیش کیا۔اس موقع پر ان کا پرتپاک استقبال کیا گیا، پاک فوج کے چاق چوبند دستے نے انہیں گارڈ آف آنر بھی پیش کیا۔