پی ایم اے کاکول میں 150ویں پی ایم اے لانگ کورس، 69ویں انٹیگریٹڈ کورس، 24ویں لیڈی کیڈٹ کورس اور 36ویں ٹیکنیکل گریجویٹ کورس کے کیڈٹس کی پاسنگ آئوٹ پریڈ ہوئی

 گزشتہ دنوں 150ویں پی ایم اے لانگ کورس، 69ویں انٹیگریٹڈ کورس، 24ویں لیڈی کیڈٹ کورس اور 36ویں ٹیکنیکل گریجویٹ کورس کے کیڈٹس کی پاسنگ آئوٹ پریڈ پاکستان ملٹری اکیڈمی (پی ایم اے)کاکول میں منعقد ہوئی۔پاکستان ملٹری اکیڈمی سے عراق، اردن، مالدیپ، سری لنکا، نیپال، فلسطین، سوڈان اور یمن سمیت کئی دوست ممالک کے کیڈٹس بھی پاس آئوٹ ہوئے۔ چیئرمین جوائنٹ چیفس آف اسٹاف کمیٹی جنرل ساحر شمشاد مرزا، نے اس موقع پر بطور مہمان خصوصی شرکت کی۔انہوں نے پریڈ کا معائنہ کیا اور ممتاز کیڈٹس کو انعامات دئیے۔ 150ویں پی ایم اے لانگ کورس کے بٹالین سینئر انڈر آفیسر عبداللہ افضل کو اعزازی تلوار سے نوازا گیا جبکہ 150ویں پی ایم اے لانگ کورس میں بٹالین سینئر انڈر آفیسر بابر اللہ امان کو پریذیڈنٹ کا گولڈ میڈل دیا گیا۔ چیئرمین جوائنٹ چیفس آف اسٹاف کمیٹی اوورسیز گولڈ میڈل  دوست ملک نیپال سے 150ویں پی ایم اے لانگ کورس کے سینئر انڈر آفیسر کشتیج گرونگ کوملا۔ 36ویں ٹیکنیکل گریجویٹ کورس کے جونیئر انڈر آفیسر محمد عمر شیراز کو چیف آف آرمی سٹاف کین سے نوازا گیا۔ 69ویں انٹیگریٹڈ کورس کے جونیئر انڈر آفیسر محمد سلیمان اور 24ویں لیڈی کیڈٹ کورس کی کورس انڈر آفیسر پاکیزہ یعقوب کو کمانڈنٹ کینز سے نوازا گیا۔