گزشتہ دنوں پاکستان ملٹری اکیڈمی (پی ایم اے)کاکول میں 149ویں پی ایم اے لانگ کورس، 14ویں مجاہد کورس، 68ویں انٹیگریٹڈ کورس اور 23ویں لیڈی کیڈٹ کورس کے کیڈٹس کی پاسنگ آئوٹ پریڈ کا انعقاد ہوا۔ پاس آئوٹ ہونے والے کیڈٹس میں دوست ممالک کے 49 کیڈٹس بھی شامل تھے۔جنرل ساحر شمشاد مرزا، چیئرمین جوائنٹ چیفس آف سٹاف کمیٹی مہمان خصوصی تھے جبکہ ترک فوج کے چیف آف جنرل سٹاف متین گورک (Metin Gurak)اس موقع پر مہمان خصوصی تھے۔
چیئرمین جوائنٹ چیفس آف سٹاف کمیٹی نے پریڈ کا جائزہ لیا اور خطاب کیا۔ چیئرمین جوائنٹ چیفس آف سٹاف کمیٹی اور ترک فوج کے چیف آف جنرل سٹاف نے ممتاز کیڈٹس کو اعزازات سے نوازا۔اکیڈمی کے سینئر انڈر آفیسر محمد نعمان عبداللہ کو اعزازی شمشیر اور 149ویں پی ایم اے لانگ کورس کے کمپنی کے سینئر انڈر آفیسر محمد عبداللہ جاوید کوپریذیڈنٹ گولڈ میڈل دیا گیا۔ چیئرمین جوائنٹ چیفس آف سٹاف کمیٹی اوورسیز گولڈ میڈل دوست ملک سعودی عرب کے سینئر انڈر آفیسر فہد بن عاقل الطوارقی الفلاج کو دیا گیا۔ چیف آف آرمی سٹاف کین 14ویں مجاہد کورس کے کورس انڈر آفیسر الیاس خان کو دی گئی۔ 68ویں انٹیگریٹڈ کورس کے کورس جونیئر انڈر آفیسر دانش ستار اور 23ویں لیڈی کیڈٹ کورس کی کورس انڈر آفیسر شیر بانو کو کمانڈنٹ کینز سے نوازا گیا۔
چیئرمین جوائنٹ چیفس آف سٹاف کمیٹی نے پاس آئوٹ ہونے والے کیڈٹس اور ان کے قابل فخر والدین کو پی ایم اے میں تربیت کی کامیاب تکمیل پر مبارکباد دی۔
اس موقع پرخطاب کرتے ہوئے جنرل ساحر شمشاد مرزا نے کہا کہ "پاکستان ملٹری اکیڈمی اپنے قیام سے لے کر اب تک فوج کے اعلیٰ ادارے میں شمولیت اختیار کرنے والے کیڈٹس کے لیے قیادت کا گہوارہ اور سینٹر آف ایکسی لینس ہے۔ گزشتہ برسوں کے دوران پی ایم اے نے متعدد غیر ملکی کیڈٹس کو بھی تربیت دی ہے جن کی کارکردگی شاندار رہی ہے۔ آج کی پریڈ اپنے بہترین فوجی نظم و ضبط کی ایک شاندار مثال ہے اور اکیڈمی پاکستان آرمی کی عظیم روایات کی عکاس ہے۔قبل ازیں آمد پر کمانڈنٹ پی ایم اے نے چیئرمین جوائنٹ چیفس آف سٹاف کا استقبال کیا۔
تبصرے