گزشتہ دنوں پاک چین شاہین-10 مشترکہ فضائی مشقوں کا چین کے شمال مغربی شہروں جیوکوان اور ینچوان میں آغاز ہوا۔ پاک فضائیہ کے مایہ ناز لڑاکا طیارے جے-10سی اور جے ایف۔17تھنڈر سمیت معاون ایئر اینڈ گرائونڈ عملہ مشقوں میں حصہ لے رہے ہیں۔

پیپلز لبریشن آرمی ایئر فورس اور پاک فضائیہ 2011 سے شاہین فضائی مشقوں کا انعقاد کر رہے ہیں جس کی میزبانی دونوں ممالک سالانہ متبادل بنیادوں پر کرتے ہیں۔ مشقیں فضائی عسکری طریقہ کار، آپریشنل تیاریوں اور مشترکہ کارروائیوں کو فروغ دینے کے ساتھ اس میں حصہ لینے والے تزویراتی شراکت داروں اور مشکل کی ہر گھڑی میں ایک دوسرے کے شانہ بشانہ کھڑے ہونے والے اتحادی ممالک کے مابین ہم آہنگی پیدا کرنے میں معاون ثابت ہوں گی۔ مزید برآں اس فضائی مشق میں ہائبرڈ وارفیئر، سائبر اسپیس اور کمپیوٹنگ جیسی خصوصیات کی شمولیت سے ہمہ وقت بدلتا جدید عسکری منظر نامہ  پاک فضائیہ کی آپریشنل صلاحیتوں میں اضافے کا باعث ہوگا۔  پیپلز لبریشن آرمی ائیر فورس اور پاک فضائیہ کے مابین دسویں مشترکہ فضائی مشقیں دونوں ممالک کی فضائی افواج کے مابین دوستی اور اتحاد کے رشتوں کو فروغ دینے کی ایک شاندار کاوش ہے۔