گزشتہ دنوں چیئرمین جوائنٹ چیفس آف سٹاف کمیٹی جنرل ساحر شمشاد مرزا نے پاک فضائیہ کی ایک آپریشنل ایئر بیس پر جاری فضائی مشق انڈس شیلڈ 2023 کا معائنہ کیا۔ان  کی آمد پر سربراہ پاک فضائیہ، ائیر چیف مارشل ظہیر احمد بابر سدھو، نے ان کا استقبال کیا۔

چیئرمین جوائنٹ چیفس آف سٹاف کمیٹی کو ایئر پاور سینٹر آف ایکسیلینس میں تربیتی سہولیات کے ساتھ ساتھ فضائی مشق کے دائرہ کار سے بھی آگاہ کیا گیا، جس کا مقصد مشق میں شریک فضائی افواج کے مابین باہمی تعاون کے فروغ اور جدید فضائی جنگی تصورات کو تقویت دینا ہے۔ ائیر چیف نے جنرل ساحر شمشاد مرزا کی جانب سے مکمل حمایت کی تعریف کی اور افواجِ پاکستان کے مابین ہم آہنگی کے فروغ کے لیے ان کی بھرپور کاوشوں کو سراہا۔ انہوں نے 14 ملکی فضائی مشق انڈس شیلڈ کی اہمیت پر روشنی ڈالی جس کے تحت پاک فضائیہ کی آپریشنل تیاریوں کو فروغ دینے کے ساتھ ساتھ شرکا ء کو عصر حاضر کے جنگی چیلنجز سے نمٹنے کے لیے تیاری مہیا کی جا رہی ہے۔ انہوں نے مزید کہا کہ یہ مشق نہ صرف شریک فضائی افواج کو اپنی بے مثال مہارت اور آپریشنل صلاحیتوں کو نمایاں کرنے کا ایک منفرد موقع فراہم کررہی ہے بلکہ شریک عسکری دستوں کے مابین ربط اور تعاون کو فروغ دینے کے لیے باہمی مفاہمت کو بھی مستحکم کرے گی۔ اس موقع پر خطاب کرتے ہوئے سربراہ پاک فضائیہ نے کہاکہ موجودہ عالمی سلامتی کی صورت حال اور تغیر پذیر جنگی محرکات مسلح افواج کے مابین بہترین شراکت داری کے متقاضی ہیں۔ انڈس شیلڈ مشق حقیقت پر مبنی فضائی جنگ کے منظرنامے اور مختلف عسکری مشنز کی عکاسی کرنے کے ساتھ، فضائی اور زمینی عملے کو فضائی جنگ کے دوران اساسوں کی تعیناتی سے متعلق مختلف حکمت عملیوں کو پرکھنے کا ایک بہترین تجربہ فراہم کرے گی۔
مشق کے شرکاء سے خطاب کرتے ہوئے چیئرمین جوائنٹ چیفس آف سٹاف کمیٹی نے فضائی جنگ کے ہمہ وقت تغیر پذیر محرکات کے تناظر میں مشترکہ مقاصد کے حصول کے لیے بین الاقوامی فضائی مشقوں کی اہمیت پر زور دیا۔ انہوں نے مشق کے شرکاء کی پیشہ ورانہ مہارت کو سراہتے ہوئے اس تاریخ ساز مشق کے  انعقاد پر ایئر پاور سینٹر آف ایکسیلینس کی کاوشوں کو سراہا جس سے نہ صرف اہم اتحادی افواج کے مابین پہلے سے موجود شراکت داری کو تقویت ملے گی بلکہ شریک فضائی افواج کے مابین باہمی تعاون کو بھی فروغ حاصل ہو گا۔ معزز مہمان نے سربراہ پاک فضائیہ کی متحرک قیادت کی بھی تعریف کی جن کے پختہ عزم اور انتھک کاوشوں کی بدولت اس مشق کو خطے کی سب سے بڑی فضائی مشقوں میں سے ایک بنانا ممکن ہوا۔
مشق انڈس شیلڈ۔2023 میں پاکستان، ترکیہ، سعودی عرب، قطر، متحدہ عرب امارات، مصر، عمان، بحرین، آذربائیجان، انڈونیشیا، مراکش، ازبکستان، چین اور ہنگری سمیت 14 فضائی افواج نے شرکت کی۔ یہ مشق حصہ لینے والی فضائی افواج کے لیے اپنی بے مثال مہارت اور آپریشنل صلاحیتوں کو  ایک پلیٹ فارم پر لانے کا ایک فقید المثال موقع فراہم کر رہی ہے۔