گزشتہ دنوں پاکستان سکواش کے ابھرتے ہوئے ستارے حمزہ خان نے ائیر ہیڈ کوارٹرز میں سربراہ پاک فضائیہ ائیر چیف مارشل ظہیر احمد بابر سدھو سے ملاقات کی۔ حمزہ آسٹریلیا کے شہر میلبورن میں منعقدہ ورلڈ جونیئر سکواش چیمپیئن شپ میں شاندار فتح کے بعد وطن لوٹے ہیں۔

اس موقع پر سربراہ پاک فضائیہ، جو کہ صدر پاکستان سکواش فیڈریشن کے عہدے پر بھی فائز ہیں، نے نوجوان کھلاڑی کی شاندار کارکردگی کو سراہا۔ ائیر چیف نے مزید کہا کہ قوم کو حمزہ خان پر فخر ہے جنہوں نے 36 سال بعد ورلڈ چیمپیئن شپ جیت کر ملک کا نام روشن کیا۔ ایسے کھلاڑی ملک کا قیمتی اثاثہ اور قوم کے نوجوانوں کے لیے مشعل راہ ہیں۔ ائیر چیف نے ڈائریکٹر جنرل ایڈمنسٹریشن کو حمزہ خان کو ہر قسم کی لاجسٹک اور انتظامی مدد فراہم کرنے کی ہدایت بھی کی تاکہ نوجوان کھلاڑی کی دور جدید کے پیرامیٹرز کے مطابق تربیت کو مزید مؤثر بنایا جا سکے۔