پُرعزم حوصلوں کا سفر جاری ہے

سال2016 اختتام پذیر ہونے کو ہے۔ یہ وطنِ عزیز اور بالخصوص سکیورٹی فورسز کے لئے کامیابیوں کا سال رہا۔ جون 2014میں شروع کئے گئے آپریشن ضرب عضب کے ثمرات کچھ ہی عرصے میں دکھائی دینے لگے تھے،لیکن رواں سال تک اس حد تک کامیابیاں نصیب ہوئیں کہ وزیرستان کے وہ علاقے جو کبھی شدت پسندوں کے قبضے میں تھے وہاں شاہراہیں اور کمرشل مارکیٹیں تعمیر ہورہی ہیں تاکہ عارضی طور پر بے گھر ہونے والے افراد جب جب اپنے گھروں کو لوٹیں‘ اُنہیں وہاں کاروبار کرنے اور روزمرہ کے معاملات چلانے میں دِقّت کا سامنا نہ ہو۔ مغربی سرحدوں کی جانب بارڈر مینجمنٹ کو یقینی بنایا جارہاہے۔افواجِ پاکستان نہ صرف دفاعِ وطن کے لئے سرگرداں ہیں بلکہ ملک کے اندر بھی جہاں جہاں ضرورت ہے تخریب کاروں کی سرکوبی کے لئے ہر اول دستے کا کردار ادا کر رہی ہیں۔ کراچی کے اندر رینجرز آپریشن سے حاصل کی گئی کامیابیاں اور ان کے نتیجے میں قائم پُرامن فضائیں ان کامیابیوں کا منہ بولتا ثبوت ہیں۔
افواجِ پاکستان کا چائنہ پاکستان اکنامک کاریڈور سی پیک کی تقریباً ایک ہزار کلومیٹر پر مشتمل شاہراہ کی بروقت تکمیل میں کلیدی کردار بھی ہمیشہ یاد رہے گا۔ دریں اثنا افواج پاکستان نے اس شاہراہ کی حفاظت کا جو بِیڑہ اٹھایا ہے اسے بھی بدرجۂ اتم نبھایا جا رہاہے اور نبھایا جاتا رہے گا۔


2016ہی میں پاک فوج کے سربراہ کی تبدیلی عمل میں آئی ہے۔ جنرل راحیل شریف کی ریٹائرمنٹ کے بعد جنرل قمرجاوید باجوہ پاک فوج کے نئے سربراہ مقرر ہوئے ہیں جو پیشہ ورانہ اعتبار سے پاک فوج کے انتہائی منجھے ہوئے جرنیل ہیں۔ ان کی قیادت میں پاک فوج اسی طرح سے دہشت گردی کے عفریت کے خاتمے سمیت مغربی اور مشرقی سرحدوں کی حفاظت کو یقینی بنانے کے لئے پُرعزم ہے۔ پاک فوج کے سپہ سالار کی تعیناتی کے ساتھ ہی بعض حلقوں کی جانب سے اڑائی جانے والی افواہیں بھی دم توڑ گئی ہیں جو مختلف حوالوں سے پھیلائی جا رہی تھیں۔ جنرل قمر جاوید باجوہ نے چیف آف آرمی سٹاف کا منصب سنبھالنے کے پہلے روز ہی شمالی وزیرستان کا دورہ کیا اور وہاں تعینات ٹروپس سے ملے اور ان کے حوصلے بڑھائے جو اس امر کی نشاندہی ہے کہ افواج پاکستان اسی طرح سے دہشت گردوں کی سرکوبی جاری رکھیں گی۔


آنے والا سال اس حوالے سے اہم ہے کہ پاک فوج اپنے نئے سربراہ کی قیادت میں مزید کامیابیاں سمیٹنے کے لئے پرعزم ہی نہیں پیشہ ورانہ اعتبار سے ان چیلنجز پر قابو پانے کی صلاحیت سے بھی مالا مال ہے۔ یوں نیا سال قوم کے لئے ایک نئی امید اور نئی امنگ لے کر طلوع ہو گا کہ زندہ اور بہادر قومیں ایسی صلاحیتوں سے لبریز ہوتی ہیں جن کی بدولت وہ کٹھن سے کٹھن مراحل سے کامیابی سے نکل آتی ہیں۔ الحمدﷲ آج پاکستان بھی اُنہیں عظیم بہادر قوموں کی صف میں کھڑا دکھائی دیتا ہے۔


پاکستان ہمیشہ زندہ باد

Read 338 times

Leave a comment

Make sure you enter the (*) required information where indicated. HTML code is not allowed.

Follow Us On Twitter